ಪ್ರವಾದಿಯವರ ಸುನ್ನತ್ ಪ್ರಕಾರ ವುದೂ ನಿರ್ವಹಿಸುವುದು ಹೇಗೆ?

ಸೌದಿ ಅರೇಬಿಯಾದ ಹಿರಿಯ ವಿದ್ವಾಂಸರಾದ ಅಲ್-ಇಮಾಮ್ ಇಬ್ನ್ ಬಾಝ್ (V) ರವರೊಂದಿಗೆ ಪ್ರಶ್ನಿಸಲಾಯಿತು :

ಪ್ರಶ್ನೆ : ವುದೂ ಹಾಗೂ ನಮಾಝಿನ ಕ್ರಮವನ್ನು ಪ್ರವಾದಿ (H) ರವರಿಂದ ದೃಢಪಟ್ಟ ವರದಿಯ ಹಿನ್ನಲೆಯಲ್ಲಿ , ಅವುಗಳ ಅತೀವ ಅಗತ್ಯವಿರುವುದರಿಂದ ಅದನ್ನು ವಿವರಿಸಿಕೊಡಬೇಕೆಂದು ನಾನು ನಿಮ್ಮಲ್ಲಿ ಕೋರುತ್ತೇನೆ. ಅಲ್ಲಾಹು ತಮಗೆ ಒಳಿತನ್ನು ಪ್ರತಿಫಲವಾಗಿ ನೀಡಲಿ.

ಉತ್ತರ : ಸರ್ವಸ್ತುತಿಗಳೂ ಅಲ್ಲಾಹುವಿಗಾಗಿದೆ. ಅಲ್ಲಾಹುವಿನ ಸಲಾತ್ ಮತ್ತು ಸಲಾಮ್‌ಗಳು ನಮ್ಮ ಪ್ರವಾದಿವರ್ಯರಾದ ಮುಹಮ್ಮದ್ (H) ರವರ ಮೇಲೂ, ಅವರ ಕುಟುಂಬದ ಮೇಲೂ ಹಾಗೂ ಅವರ ಸಹಚರರ ಮೇಲೂ ಇರಲಿ.

ಪ್ರವಾದಿ (H) ರವರ ಸಹೀಹ್ಆದ ಹದೀಸ್‌ಗಳು ಸೂಚಿಸುವುದೇನೆಂದರೆ : ಅವರು (H) ವುದೂ ನಿರ್ವಹಿಸುವ ನಿಯ್ಯತ್ಅನ್ನು (ಮನಸ್ಸಿನಲ್ಲಿ ದೃಢಸಂಕಲ್ಪ) ಇಟ್ಟುಕೊಂಡು ವುದೂವಿನ ಪ್ರಾರಂಭದಲ್ಲಿ ತಮ್ಮ ಅಂಗೈಯನ್ನು ಮೂರು ಬಾರಿ ತೊಳೆಯುತ್ತಿದ್ದರು ಮತ್ತು (ಅದೇವೇಳೆ) “ಬಿಸ್ಮಿಲ್ಲಾಹ್” (ಅರ್ಥಾತ್) ಅಲ್ಲಾಹುವಿನ ನಾಮದಿಂದ (ನಾನು ಆರಂಭಿಸುತ್ತಿರುವೆನು) ಎಂದು ಹೇಳುತ್ತಿದ್ದರು – ಇದು (ಅರ್ಥಾತ್ ಈ ರೀತಿ ಬಿಸ್ಮಿಲ್ಲಾಹ್ ಎಂದು ಹೇಳುವುದು) ಸ್ಥಿರೀಕರಿಸಲಾಗಿದೆ. ಅನೇಕ ಹದೀಸ್‌ಗಳಲ್ಲಿ ಇದು ವರದಿಯಾಗಿದೆ, ಪ್ರವಾದಿ (H) ಹೇಳಿದರು :

« لَا وُضُوءَ لِمَنْ لَمْ يَذْكُرْ اسْمَ اللَّهِ عَلَيْهِ »

“ಯಾರು (ವುದೂ ನಿರ್ವಹಿಸುವಾಗ) ಅಲ್ಲಾಹುವಿನ ನಾಮವನ್ನು ಉಚ್ಛರಿಸುವುದಿಲ್ಲವೋ ಅವನಿಗೆ ವುದೂ ಇಲ್ಲ (ಅರ್ಥಾತ್ ಅವನ ವುದೂ ಸಿಂಧುವಲ್ಲ).” (ಸುನನ್ ಅಬೀದಾವುದ್ : 102, ಸುನನ್ ಅತ್ತಿರ್ಮಿದೀ : 25, ಸುನನ್ ಇಬ್ನ್ ಮಾಜಃ : 397)

ವುದೂ ನಿರ್ವಹಿಸುವವನು ವುದೂವಿನ ಪ್ರಾರಂಭದಲ್ಲಿ ‘ಬಿಸ್ಮಿಲ್ಲಾಹ್’ ಅರ್ಥಾತ್ ಅಲ್ಲಾಹುವಿನ ನಾಮದಿಂದ (ನಾನು ಪ್ರಾರಂಭಿಸುತ್ತಿರುವೆನು) ಎಂದು ಹೇಳುವುದರ ಮೂಲಕ ಆರಂಭಿಸಬೇಕಾಗಿದೆ. ಕೆಲವು ಉಲಮಾಗಳು ಇದನ್ನು ನೆನಪಿರುವ ಸಂದರ್ಭದಲ್ಲಿ ಹೇಳುವುದನ್ನು ಕಡ್ಡಾಯವೆಂದು ಪರಿಗಣಿಸಿರುವರು, ಆದರೆ ಓರ್ವನು ಅದನ್ನು (ಬಿಸ್ಮಿಲ್ಲಾಹ್ ಹೇಳುವುದನ್ನು) ಮರೆತರೆ ಅಥವಾ (ಹೇಳುವುದು ಕಡ್ಡಾಯವೆಂದು) ತಿಳಿಯದೆ ಹೋದರೆ ಯಾವುದೇ ತೊಂದರೆಯಿಲ್ಲ.

ನಂತರ ಅವನು ಮೂರು ಬಾರಿ ತನ್ನ ಬಾಯನ್ನು ಮುಕ್ಕಳಿಸಬೇಕಾಗಿದೆ ಮತ್ತು (ಮೂಗಿನೊಳಗೆ) ನೀರೆಳೆಯಬೇಕಾಗಿದೆ ಮತ್ತು (ಅದರ ನಂತರ) ತನ್ನ ಮುಖವನ್ನು ಮೂರು ಬಾರಿ ತೊಳೆಯಬೇಕಾಗಿದೆ. ನಂತರ ತನ್ನ ಬಲ ಕೈಯಿಂದ ಆರಂಭಿಸಿ ಬಳಿಕ ಎಡಗೈಯನ್ನೂ, ಮೊಣಕೈಗಳವರೆಗೆ ಮೂರು ಬಾರಿ ತೊಳೆಯಬೇಕಾಗಿದೆ. ಅದಾದನಂತರ, ಅವನು ತನ್ನ ತಲೆ ಮತ್ತು ಕಿವಿಗಳನ್ನು ಒಂದು ಬಾರಿ ಸವರಬೇಕಾಗಿದೆ. ಆನಂತರ, ಬಲ ಕಾಲಿನಿಂದ ಆರಂಭಿಸಿ, ತನ್ನ ಕಾಲುಗಳನ್ನು ಹರಡುಗಂಟುಗಳ ತನಕ ಮೂರು ಬಾರಿ ತೊಳೆಯಬೇಕಾಗಿದೆ.

ಅವನೊಂದು ವೇಳೆ (ತನ್ನ ಅಂಗಾಗಗಳನ್ನು) ಒಂದು ಅಥವಾ ಎರಡು ಬಾರಿ ತೊಳೆದರೆ, ಅದರಲ್ಲಿ ಯಾವುದೇ ತೊಂದರೆಯಿಲ್ಲ. ಯಾಕೆಂದರೆ (ಹದೀಸ್‌ಗಳಲ್ಲಿ ವರದಿಯಾದ ಪ್ರಕಾರ) ಪ್ರವಾದಿ (H) ರವರು (ತನ್ನ ಪ್ರತಿಯೊಂದು ಅಂಗಾಗವನ್ನು) ಒಂದು ಬಾರಿ, ಎರಡು ಬಾರಿ ಮತ್ತು ಮೂರು ಬಾರಿಯಾಗಿ ತೊಳೆಯುತ್ತಾ ವುದೂ ನಿರ್ವಹಿಸುತ್ತಿದ್ದರು, ಹಾಗೂ ಕೆಲವೊಮ್ಮೆ ಅವರು (H) ತಮ್ಮ ಕೆಲವು ಅಂಗಾಗಗಳನ್ನು ಎರಡು ಬಾರಿ ಮತ್ತು ಇನ್ನು ಕೆಲವನ್ನು ಮೂರುಬಾರಿ ತೊಳೆದುಕೊಳ್ಳುತ್ತಿದ್ದರು. ಇದು ಸೂಚಿಸುವುದೇನೆಂದರೆ ಈ ವಿಷಯದಲ್ಲಿ (ಈ ರೀತಿ ವುದೂ ನಿರ್ವಹಿಸುವ ಕ್ರಮವು) ವಿಶಾಲತೆಯನ್ನೊಳಗೊಂಡಿದೆ (ಅರ್ಥಾತ್ ಮೇಲೆ ತಿಳಿಸಿದ ವುದೂವಿನ ಕ್ರಮದಲ್ಲಿ ಯಾವುದಾದರೂ ಮಾಡಬಹುದು), ಸರ್ವಸ್ತುತಿಗಳೂ ಅಲ್ಲಾಹುವಿಗೆ ಮೀಸಲು. ಅದಾಗ್ಯೂ, ಮೂರುಬಾರಿ ತೊಳೆಯುವುದು ಉತ್ತಮವಾಗಿದೆ.

ಇದು (ವುದೂ ನಿರ್ವಹಿಸುವ ಈ ಕ್ರಮವು) ಅವನು ಮೂತ್ರ ವಿಸರ್ಜನೆ ಅಥವಾ ಮಲವಿಸರ್ಜನೆ ಮಾಡದಿದ್ದರೆ ನಿರ್ವಹಿಸಬೇಕಾದ ಕ್ರಮವಾಗಿದೆ.

ಅವನೊಂದು ವೇಳೆ ಮೂತ್ರ ವಿಸರ್ಜನೆ ಅಥವಾ ಮಲವಿಸರ್ಜನೆ ಮಾಡಿದ್ದರೆ, ಮೊದಲನೆಯದಾಗಿ ಅವನು ಇಸ್ತಿನ್‌ಜಾಅ್ (الاستنجاء) ಅನ್ನು ನಿರ್ವಹಿಸಬೇಕಾಗಿದೆ. (ಅರ್ಥಾತ್ ಗುಪ್ತಾಂಗಗಳಿಂದ ಮಾಲಿನ್ಯವು ನೀಗುವವರೆಗೆ ನೀರಿನಿಂದ ತೊಳೆದು ಅದನ್ನು ಶುಚಿಗೊಳಿಸಬೇಕಾಗಿದೆ), ನಂತರ ಮೇಲೆ ತಿಳಿಸಲಾದ ರೀತಿಯಲ್ಲಿ ವುದೂ ನಿರ್ವಹಿಸಬೇಕಾಗಿದೆ. ಇನ್ನು (ಗುದದ್ವಾರದಿಂದ) ವಾಯು ಹೊರಬರುವುದು, ನಿದ್ದೆ, ಗುಪ್ತಾಂಗಗಳನ್ನು ಸ್ಪರ್ಶಿಸುವುದು ಮತ್ತು ಒಂಟೆ ಮಾಂಸವನ್ನು ತಿನ್ನುವುದು ಮುಂತಾದವುಗಳಿಗೆ ಇಸ್ತಿನ್‌‍ಜಾಅ್ ನಿರ್ವಹಿಸಬೇಕಾಗಿಲ್ಲ ಬದಲಾಗಿ ಮೇಲೆ ತಿಳಿಸಲಾದ ರೀತಿಯಲ್ಲಿ ವುದೂ ನಿರ್ವಹಿದರೆ ಸಾಕಾಗುವುದು.

ವುದೂ ನಿರ್ವಹಿಸಿದ ನಂತರ ಸತ್ಯವಿಶ್ವಾಸಿಗರಾದ ಸ್ತ್ರೀ-ಪುರುಷನು ಈ ಕೆಳಗಿನ ದುಆವನ್ನು ಹೇಳುವುದು ಅಪೇಕ್ಷಣೀಯವಾದುದಾಗಿದೆ, ಪ್ರವಾದಿ (H) ರಿಂದ ಸಹೀಹ್ಆಗಿ ವರದಿಯಾಗಿರುವಂತೆ :

« أَشْهَدُ أَنْ لَا إِلَهَ إِلَّا اللَّهُ وَحْدَهُ لَا شَرِيكَ لَهُ، وَأَشْهَدُ أَنَّ مُحَمَّدًا عَبْدُهُ وَرَسُولُهُ، اللَّهُمَّ اجْعَلْنِي مِنَ التَّوَّابِينَ، وَاجْعَلْنِي مِنَ المُتَطَهِّرِينَ »

“ಅಲ್ಲಾಹುವಿನ ಹೊರತು ಆರಾಧನೆಗೆ ನೈಜ ಹಕ್ಕುದರಾರು ಯಾರೂ ಇಲ್ಲ, ಅವನು ಏಕೈಕನಾಗಿರುವನು, ಅವನಿಗೆ ಸಹಭಾಗಿಗಳಾರೂ ಇಲ್ಲವೆಂದು ನಾನು ಸಾಕ್ಷ್ಯವಹಿಸುತ್ತೇನೆ ಮತ್ತು ಮುಹಮ್ಮದ್ (H) ರವರು ಆತನ ದಾಸರೂ ಸಂದೇಶವಾಹಕರೂ ಆಗಿದ್ದಾರೆಂದು ನಾನು ಸಾಕ್ಷ್ಯವಹಿಸುತ್ತೇನೆ. ಓ ಅಲ್ಲಾಹ್! ನಿನ್ನೆಡೆಗೆ ಸದಾ ಪಶ್ಚಾತ್ತಾಪಪಟ್ಟು ಮರಳುವವರ ಪೈಕಿ ಮತ್ತು ಶುಚಿತ್ವವನ್ನು ಪಾಲಿಸುವವರ ಪೈಕಿ ನನ್ನನ್ನು ಸೇರಿಸು.” (ಸುನನ್ ಅತ್ತಿರ್ಮಿದೀ : 55)

ಇನ್ನು. ವುದೂ ನಿರ್ವಹಿಸಿದವರು ‘ಸುನ್ನಃ ಅಲ್-ವುದೂ’ ಎಂದು ಕರೆಯಲ್ಪಡುವ ಎರಡು ರಕ್ಅತ್ (ಸುನ್ನತ್ ನಮಾಝ್) ನಿರ್ವಹಿಸುವುದು ಅಪೇಕ್ಷಣೀಯವಾದುದಾಗಿದೆ ಹಾಗೂ ಅವನೊಂದು ವೇಳೆ ವುದೂವಿನ ನಂತರ ರವಾತಿಬ್ಆದ ಸುನ್ನತ್ ನಮಾಝ್ (ಅರ್ಥಾತ್ ಫರ್ದ್ ನಮಾಝ್‌ಗಳ ಜೊತೆಗೆ ನಿರ್ವಹಿಸಲಾಗುವ ನಮಾಝ್) ನಿರ್ವಹಿಸಿದ್ದಲ್ಲಿ, ಅದು ಸುನ್ನಃ ಅಲ್-ವುದೂವಿನ ಸ್ಥಾನವನ್ನು ಪೂರೈಸುತ್ತದೆ.