ಐಸಿಸ್ ಮತ್ತು ಅಲ್-ಖಾಯಿದ ಮುಂತಾದ ಎಲ್ಲಾ ತೀವ್ರವಾದಿ ಹಾಗೂ ಉಗ್ರವಾದಿ ಗುಂಪುಗಳನ್ನು ಇಸ್ಲಾಮ್‌ನ ಪರಿಭಾಷೆಯಲ್ಲಿ ಖವಾರಿಜ್‌ಗಳು ಎಂದು ಕರೆಯೆಲಾಗುತ್ತದೆ. ಖವಾರಿಜ್‌ಗಳೆಂದರೆ, ಹಿಂದೆ ಪ್ರವಾದಿ ಮುಹಮ್ಮದ್ (H) ರವರ ಸಹಚರರಾದ ಸಹಾಬಿಗಳ ವಿರುದ್ಧ ಬಂಡಾಯವೆದ್ದ ಒಂದು ಉಗ್ರವಾದಿ ಪಂಗಡದ ಹೆಸರಾಗಿದೆ. ಪ್ರವಾದಿ ಮುಹಮ್ಮದ್ (H) ರವರು ನ್ಯಾಯ ಪಾಲಿಸುತ್ತಿಲ್ಲ ಎಂದು ಆರೋಪಿಸಿಕೊಂಡು ಈ ಉಗ್ರವಾದಿ ಸಿದ್ದಾಂತಕ್ಕೆ ತಳಪಾಯ ಹಾಕಿದವನು ದುಲ್ ಖುವೈಸಿರಃ ಅತ್ತಮೀಮೀ ಎಂಬ ವ್ಯಕ್ತಿಯಾಗಿದ್ದಾನೆ. ಅವನನ್ನು ಇಸ್ಲಾಮ್‌ನಿಂದ ಪಥಭ್ರಷ್ಟಗೊಂಡ ಕಪಟಿಗ ಎಂದು ಕುರ್‌ಆನ್ ಪ್ರಸ್ತಾಪಿಸಿದೆ. ವಾಸ್ತವದಲ್ಲಿ ಖವಾರಿಜ್‌ಗಳು ಪ್ರವಾದಿ ಮುಹಮ್ಮದ್ (H) ರವರ ಬೋಧನೆ, ಆಡಳಿತ ಮತ್ತು ಅವರು ತೋರಿಸಿಕೊಟ್ಟ ನ್ಯಾಯ ವ್ಯವಸ್ಥೆಗೆ ಧಕ್ಕೆ ತಂದ ಪಾತಕಿಗಳಾಗಿದ್ದಾರೆ.

ಪ್ರವಾದಿ ಮುಹಮ್ಮದ್ (H) ರವರ ಮರಣಾನಂತರ ಸಹಾಬಿಗಳನ್ನು (ಅರ್ಥಾತ್ ಪ್ರವಾದಿ ಮುಹಮ್ಮದ್ H ರವರ ಸಹಚರರನ್ನು) ಇಸ್ಲಾಮ್‌ನಿಂದ ಹೊರಹಾಕಿದರಲ್ಲದೆ ಇಸ್ಲಾಮ್‌ನ ನಾಲ್ವರು ಶ್ರೇಷ್ಠ ಖಲೀಫರ ಪೈಕಿ ಇಬ್ಬರಾದ ಉಸ್ಮಾನ್ ಬಿನ್ ಅಫ್ಫಾನ್ ಮತ್ತು ಅಲೀ ಬಿನ್ ಅಬೀ ತಾಲಿಬ್ (L) ರನ್ನು ದಾರುಣವಾಗಿ ಹತ್ಯೆಗೈದವರು ಇದೇ ಖವಾರಿಜ್‌ಗಳಾಗಿದ್ದಾರೆ. ಉಸ್ಮಾನ್ ಮತ್ತು ಅಲೀ (L) ಇವರಿಬ್ಬರೂ ಪ್ರವಾದಿ ಮುಹಮ್ಮದ್ (H) ರವರ ಅಳಿಯಂದಿರಾಗಿದ್ದರು, ಹಾಗೂ ಸಜ್ಜನ ಮುಸ್ಲಿಮರಾಗಿದ್ದರು. ತಮ್ಮ ಪಥಭ್ರಷ್ಟ ಸಿದ್ದಾಂತವನ್ನು ಅಂಗೀಕರಿಸದ ಯಾರೊಬ್ಬರನ್ನು ಖವಾರಿಜ್‌ಗಳು ಸುಮ್ಮನೆ ಬಿಡುತ್ತಿರಲಿಲ್ಲ. ಅವರ ಕ್ರೌರ್ಯದ ಪರಕಾಷ್ಠೆ ಎಷ್ಟು ತಲುಪಿತ್ತೆಂದರೆ ಗರ್ಭಾವತಿ ಮಹಿಳೆಯೋರ್ವಳ ಹೊಟ್ಟೆಯನ್ನು ಸೀಳಿ ಆಕೆಯನ್ನು ಬರ್ಬರವಾಗಿ ಕೊಂದು, ಆಕೆಯ ಪತಿಯ ರುಂಡವನ್ನೇ ಕತ್ತರಿಸಿ ವಿಕೃತಿ ಮೆರೆದಿದ್ದರು ಆ ದುರುಳರು.

ಹೀಗೆ ಈ ಖವಾರಿಜ್‌ಗಳಾದ ಉಗ್ರವಾದಿಗಳು ಮಹಿಳೆಯರು, ಮಕ್ಕಳು, ವೃದ್ದರು, ಅಮಾಯಕರು ಎನ್ನದೇ ಅವರನ್ನೆಲ್ಲಾ ಅತ್ಯಂತ ಕ್ರೂರ ಹಾಗೂ ಅಮಾನುಷವಾಗಿ ಹತ್ಯೆಗೈದು ತಮ್ಮ ಕ್ರೌರ್ಯದ ಅಟ್ಟಹಾಸವನ್ನು ಮುಂದುವರೆಸಿದರು. ಆ ನಂತರ ಅವರು ಸಿರಿಯಾ ಮತ್ತು ಈಜಿಪ್ಟ್‌ಗೆ ನಿಯೋಗಿಸಲ್ಪಟ್ಟಿದ್ದ ಆಡಳಿತಗಾರರೂ ಪ್ರವಾದಿ ಮುಹಮ್ಮದ್ (H) ರವರ ಆಪ್ತ ಸಹಚರರೂ ಆದ ಮುಆವಿಯಾ ಮತ್ತು ಅಮ್ರ್ ಬಿನ್ ಅಲ್-ಆಸ್ (L) ರವರನ್ನು ಹತ್ಯೆ ಮಾಡಲು ವಿಫಲ ಯತ್ನ ನಡೆಸಿದರು.

ಇಸ್ಲಾಮಿನ ಇತಿಹಾಸದಲ್ಲಿ ಪ್ರಥಮವಾಗಿ ರಾಜಾಡಳಿತವನ್ನು ನಡೆಸಿದ ಉಮವಿಯ್ಯಃ ಹಾಗೂ ಅಬ್ಬಾಸಿಯ್ಯಃ ಎಂಬ ಎರಡು ವಂಶಗಳ ಆಡಳಿತದ ವಿರುದ್ಧ ಖವಾರಿಜ್‌ಗಳು ದಂಗೆಗಳನ್ನು ಎಬ್ಬಿಸುತ್ತಾ ನಾಡಿನ ಶಾಂತಿ, ಸುರಕ್ಷತೆ ಮತ್ತು ಭದ್ರತೆಗೆ ಧಕ್ಕೆ ತರುವಂತಹ ಎಲ್ಲಾ ಪ್ರಯತ್ನಗಳನ್ನು ಅವರು ನಡೆಸುತ್ತಲೇ ಬಂದರು. ಈ ಖವಾರಿಜ್‌ಗಳಾದ ಉಗ್ರವಾದಿಗಳಿಂದಾಗಿ ಲಕ್ಷಾಂತರ ಮುಸ್ಲಿಮರು ಹತ್ಯೆಗೈಯಲ್ಪಟ್ಟಿರುವುದಾಗಿ ಪ್ರಸಿದ್ಧ ಮುಸ್ಲಿಮ್ ವಿದ್ವಾಂಸರಾದ ಇಮಾಮ್ ಅಝ್ಝಹಬೀ (V) ರವರು ತಮ್ಮ ಗ್ರಂಥಗಳಲ್ಲಿ ಉಲ್ಲೇಖಿಸಿದ್ದಾರೆ. ವಾಸ್ತವದಲ್ಲಿ ಈ ಉಗ್ರವಾದಿಗಳು ಇಸ್ಲಾಮ್ ಮತ್ತು ಮುಸ್ಲಿಮರ ವಿರುದ್ಧ ಹಾಗೂ ಅದರ ಶಾಂತಿಯುತ ಆಶಯಗಳ ವಿರುದ್ಧ ದಂಗೆಸಾರುವ ಗುಂಪಾಗಿದ್ದಾರೆ.

• ಅವರು ಎರಡು ಸಂದರ್ಭ ಹಾಗೂ ಪರಿಸ್ಥಿತಿಗಳಲ್ಲಿ ಹುಟ್ಟಿಕೊಳ್ಳುತ್ತಾರೆ :
  1. ತಮ್ಮ ಧರ್ಮದ ಕುರಿತು ಸರಿಯಾಗಿ ತಿಳಿದುಕೊಳ್ಳದೆ ಅಜ್ಞಾನಿಗಳಾಗಿ ಉಳಿದುಕೊಂಡು ಅದರ ನೈಜ ಸಂದೇಶಗಳಿಂದ ದಾರಿತಪ್ಪಿದಾಗ ಹಾಗೂ
  2. ದೇಶದ ಜನರ ಆಂತರಿಕ ಕಲಹ ಮತ್ತು ರಾಜಕೀಯ ಅಸ್ಥಿರತೆ ಹಾಗೂ ಪ್ರಕ್ಷುಬ್ಧ ರಾಜಕೀಯ ಪರಿಸ್ಥಿತಿ ನಿರ್ಮಾಣವಾದಾಗ.

ಈ ಖವಾರಿಜ್‌ಗಳು ಪ್ರಥಮವಾಗಿ ಕಾಣಿಸಿಕೊಂಡಿರುವುದು ಇರಾಕ್‌ನ ಕಡೆಯಲ್ಲಾಗಿತ್ತು. ಇಂತಹ ಉಗ್ರವಾದಿಗಳು ಮುಂದೊಂದು ದಿನ ಬರುವರೆಂದು ಪ್ರವಾದಿ ಮುಹಮ್ಮದ್ (H) ರವರು ಮೊದಲೇ ದಿವ್ಯವಾಣಿಯಿಂದ ಭವಿಷ್ಯವನ್ನು ನುಡಿದಿದ್ದರು. ಅವರ ಹಲವಾರು ಲಕ್ಷಣಗಳ ಕುರಿತು ಪ್ರವಾದಿ ಮುಹಮ್ಮದ್ (H) ರವರು ನಮಗೆ ತಿಳಿಸಿಕೊಟ್ಟಿರುವರು ಹಾಗೂ ಅವರ ವಿರುದ್ಧ ಅನೇಕ ಎಚ್ಚರಿಕೆಗಳನ್ನು ನೀಡಿರುವರು, ಪ್ರವಾದಿ ಮುಹಮ್ಮದ್ (H) ರವರು ಉಗ್ರವಾದಿಗಳ ಕುರಿತು ಈ ರೀತಿ ಹೇಳಿರುವರು:

1. ಅವರ ಪೈಕಿ ಬಹುತೇಕರು ಕಿರು ಪ್ರಾಯದ ಯುವಕರಾಗಿರುವರು ಮತ್ತು ಅವಿವೇಕಿಗಳಾಗಿರುವರು.
2. ತಮ್ಮ ಧರ್ಮದ ಬಗ್ಗೆ ಯಾವುದೇ ಸರಿಯಾದ ತಿಳುವಳಿಕೆ ಇಲ್ಲದ ಅಜ್ಞಾನಿಗಳಾಗಿರುವರು.
3. ಅವರು ಕುರ್‌ಆನ್ಅನ್ನು ಪಾರಾಯಣ ಮಾಡುವರು ಆದರೆ ಅದು ಅವರ ಗಂಟಲಿನಾಚೆಗೆ ತಲುಪುವುದಿಲ್ಲ (ಅರ್ಥಾತ್ ವಿಶ್ವಾಸವು ಅವರ ಹೃದಯದೊಳಗೆ ತಲುಪುವುದಿಲ್ಲ) ಹಾಗೂ ಅವರ ಮನಸ್ಸಿಗೆ ಅದು ಪರಿಣಾಮ ಬೀರದು.
4. ಅವರು ತೋರಿಕೆಗಷ್ಟೇ ಧರ್ಮನಿಷ್ಠೆ ಹೊಂದಿರುವವರಾಗಿರುವರು.

ಅವರನ್ನು ಅಂಗೀಕರಿಸದ ಮುಸ್ಲಿಮರನ್ನು ಅವರು ಕೊಲ್ಲುವರು ಹಾಗೂ ಇಸ್ಲಾಮಿನ ಸನ್ಮಾರ್ಗದಿಂದ ಅತೀ ವೇಗವಾಗಿ ಅವರು ಹೊರಹೋಗುವರು. ಅವರು ಎಲ್ಲಾ ಕಾಲದಲ್ಲೂ ಕಾಣಿಸಿಕೊಳ್ಳುವರೆಂದೂ, ಆ ಸಮಯದಲ್ಲಿ ಮುಸ್ಲಿಮರು ತಮ್ಮ ಆಡಳಿತಗಾರರ ಜೊತೆಗೂಡಿ ಉಗ್ರವಾದಿಗಳ ವಿರುದ್ಧ ಹೋರಾಡಿ ಅವರನ್ನು ಮಟ್ಟ ಹಾಕಬೇಕೆಂದು ಪ್ರವಾದಿ ಮುಹಮ್ಮದ್ (H) ರವರು ಮುಸ್ಲಿಮರಿಗೆ ಆಜ್ಞಾಪಿಸಿರುವರು. ಪ್ರವಾದಿ ಮುಹಮ್ಮದ್ (H) ರವರ ಈ ವಚನಗಳ ಆಧಾರದಲ್ಲಿ ಅವರನ್ನು ಖವಾರಿಜ್‌ಗಳೆಂದು ಕರೆಯಲಾಗುತ್ತದೆ.

ಖವಾರಿಜ್ ಅಂದರೆ : ಇಸ್ಲಾಮ್ ಮತ್ತು ಮುಸ್ಲಿಮರ ಸನ್ಮಾರ್ಗದಿಂದ ಬೇರ್ಪಟ್ಟು ಉಗ್ರವಾದದ ಸಿದ್ಧಾಂತವನ್ನು ಮೈಗೂಡಿಸಿಕೊಂಡು ಅದನ್ನು ಪ್ರತಿಪಾದಿಸುವವರು ಅಥವಾ ಉಗ್ರ ಚಟುವಟಿಕೆಗಳಲ್ಲಿ ಭಾಗಿಯಾಗುವವರು ಎಂದಾಗಿದೆ. ಇಸ್ಲಾಮ್‌ನ ಅನೇಕ ಗೌರವಾನ್ವಿತ ಹಿರಿಯ ವಿದ್ವಾಂಸರು, ಖವಾರಿಜ್‌ಗಳನ್ನು ಇಸ್ಲಾಮ್ ಧರ್ಮದಿಂದ ಹೊರಹೋದ ಧರ್ಮಭ್ರಷ್ಟರೆಂದು ಪರಿಗಣಿಸಿರುವರು.