ಬಾಂಬ್, ಕ್ಷಿಪಣಿ ಮುಂತಾದ ಯುದ್ಧೋಪಕರಣಗಳನ್ನು ಉಪಯೋಗಿಸಿಕೊಂಡು ಉಗ್ರವಾದವನ್ನು ಮೆರೆದು ಇದೀಗ ಆತ್ಮಹತ್ಯಾ ದಾಳಿಗಳ ಮೂಲಕ ಉಗ್ರವಾದಿಗಳು ತಮ್ಮ ಅಮಾನುಷ ಕೃತ್ಯಗಳನ್ನು ಹಬ್ಬಿಸುತ್ತಿರುವುದನ್ನು ನಾವು ಕಾಣುತ್ತಿದ್ದೇವೆ. ಆತ್ಮಹತ್ಯಾ ದಾಳಿಗಳನ್ನು ಇಸ್ಲಾಮಿಗಾಗಿ ನಡೆಸುವ “ಜಿಹಾದ್” ಎಂದು ತಪ್ಪಾಗಿ ಬಿಂಬಿಸಿ, ತನ್ನನ್ನು ಸ್ವತಃ ಸ್ಫೋಟಿಸಿ ಆತ್ಮಹತ್ಯೆಗೈಯ್ಯುವ ದುಷ್ಕರ್ಮಿಗಳನ್ನು ಹುತಾತ್ಮರೆಂದು (ಶಹೀದ್ ಎಂದು) ಬಣ್ಣಿಸಿ ಅಂತಹ ಪಾಪಿಗಳನ್ನು ವೈಭವೀಕರಿಸುವುದನ್ನು ನಾವು ಕಾಣುತ್ತಿದ್ದೇವೆ. ಇಂತಹ ನಾನಾ ಸನ್ನಿವೇಶಗಳಿಂದ ಮುಸ್ಲಿಮೇತರರಲ್ಲಿ ಹೆಚ್ಚೇಕೆ ಸಾಮಾನ್ಯ ಮುಸ್ಲಿಮರ ತಲೆಯಲ್ಲೂ ಈ ಕುರಿತು ತಪ್ಪುಕಲ್ಪನೆಗಳು ಗೂಡುಕಟ್ಟಿರುವುದು ಬಲು ಬೇಸರದ ಸಂಗತಿಯಾಗಿದೆ.

ಇಸ್ಲಾಮಿನ ಮೇಲೆ ಹೇರಲಾದ ಈ ತಪ್ಪುಕಲ್ಪನೆಯನ್ನು ಛಿದ್ರಗೊಳಿಸುತ್ತಾ ಆತ್ಮಹತ್ಯಾ ದಾಳಿಗಳ ವಿರುದ್ಧ ಇಸ್ಲಾಮಿನ ಸ್ಪಷ್ಟ ನಿಲುವಿನ ಬಗ್ಗೆ ಸೌದಿ ಅರೇಬಿಯಾದ ಹಿರಿಯ ವಿದ್ವಾಂಸರ ಪೈಕಿ ಓರ್ವರಾದ ಅಶ್ಶೈಖ್ ಅಬ್ದುಲ್ ಮುಹ್ಸಿನ್ ಬಿನ್ ಹಮದ್ ಅಲ್-ಅಬ್ಬಾದ್ ಅಲ್-ಬದ್ರ್ (حَفِظَهُ اللَّهُ) ಹೇಳುತ್ತಾರೆ :

ಅನ್ಯಾಯವಾಗಿ ಅಮಾಯಕರ ಹತ್ಯೆ ನಡೆಸುವುದು ಮಹಾಪಾಪಗಳ ಪೈಕಿ ಸೇರಿದ ಮಹಾ ದುಷ್ಕೃತ್ಯವಾಗಿದೆ. ನಮಾಝ್’ನಲ್ಲಿ ನಿರತರಾಗಿರುವವರನ್ನು ಹತ್ಯೆಗೈಯ್ಯುವುದು ಅದರ ದುಷ್ಟತೆಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಆಶ್ರಮಗಳಲ್ಲಿರುವ ಸನ್ಯಾಸಿಯರನ್ನು ಹತ್ಯೆಗೈಯ್ಯುವುದನ್ನು ಹೇಗೆ ಇಸ್ಲಾಮೀ ಶರೀಅತ್ ನಿಷೇಧಿಸಿದೆಯೋ ಅದೇ ರೀತಿ ಮಸೀದಿಗಳಲ್ಲಿ ನಮಾಝ್ ನಿರ್ವಹಿಸುವವರ ಹತ್ಯೆಗೈಯ್ಯುವುದನ್ನು ಮೊಟ್ಟಮೊದಲನೆಯದಾಗಿ ನಿಷೇಧಿಸಿದೆ.

ಸೊಂಟಪಟ್ಟಿಯಲ್ಲಿ ಸ್ಫೋಟಕವನ್ನಿಟ್ಟುಕೊಂಡು ಆತ್ಮಹತ್ಯಾ ದಾಳಿ ನಡೆಸಿ ತನ್ನನ್ನು ಸ್ವತಃ ಸ್ಪೋಟಿಸಿಕೊಳ್ಳಲು ಯಾವೊಬ್ಬ ಮುಸ್ಲಿಮನಿಗೂ ಯಾವುದೇ ಕಾರಣಕ್ಕೂ ಅಥವಾ ಯಾವುದೇ ಸಂದರ್ಭದಲ್ಲೂ ಸಮ್ಮತಾರ್ಹವಲ್ಲ. ಯಾಕೆಂದರೆ ಅಲ್ಲಾಹು ಹೇಳುತ್ತಾನೆ :

﴿ وَلَا تَقْتُلُوا أَنفُسَكُمْ ﴾

“ನೀವು ನಿಮ್ಮನ್ನೇ ವಧಿಸದಿರಿ (ಪರಸ್ಪರ ಕೊಲ್ಲಬೇಡಿರಿ).” (ಕುರ್‌ಆನ್ 4 :29)

ಸೌದಿ ಅರೇಬಿಯಾದ ಹಿರಿಯ ಉಲಮಾ ಮಂಡಳಿಯ ಸದಸ್ಯರಾದ ಅಶ್ಶೈಖ್ ಸಾಲಿಹ್ ಅಲ್-ಫೌಝಾನ್ (حَفِظَهُ اللَّهُ) ಹೇಳುತ್ತಾರೆ :

ಸರ್ಕಾರಿ (ಸಾರ್ವಜನಿಕ) ಸವಲತ್ತುಗಳನ್ನು (ಹಾನಿಯನ್ನುಂಟು ಮಾಡದೆ) ಸುಸ್ಥಿತಿಯಲ್ಲಿಡುವುದು, ಅವುಗಳನ್ನು ಸಂರಕ್ಷಿಸುವುದು ಹಾಗೂ ಅವುಗಳ ಅಭಿವೃದ್ದಿಯನ್ನು ಖಾತ್ರಿಪಡಿಸುವುದು ಮುಸ್ಲಿಮರ ಮೇಲೆ ಕಡ್ಡಾಯವಾಗಿದೆ. ಹಾಗಾದರೆ (ಸರ್ಕಾರಿ) ಸವಲತ್ತುಗಳನ್ನು ಧ್ವಂಸಗೊಳಿಸುವ ಮತ್ತು (ಬಾಂಬುಗಳನ್ನೆಸೆದು) ಸ್ಪೋಟಿಸುವ ಹಾಗೂ ಇನ್ನಿತರ ಉಗ್ರ ಚಟುವಟಿಕೆಗಳ ಮೂಲಕ ಅವುಗಳನ್ನು ನಿರ್ನಾಮಗೊಳಿಸುವವರ (ದುಃಸ್ಥಿತಿ) ಹೇಗಿರಬಹುದು ? ಮಸೀದಿಗಳೂ (ಕೂಡ) ಅವರಿಂದ (ಉಗ್ರವಾದಿಗಳಿಂದ) ಸುರಕ್ಷಿತವೇನಲ್ಲ. ಅವರು ಅವುಗಳನ್ನು (ಮಸೀದಿಗಳನ್ನು) ಸ್ಪೋಟಿಸುತ್ತಾರೆ, ಹಾಗೂ (ಅವುಗಳೆಡೆಗೆ) ಬಾಂಬುಗಳನ್ನು ಎಸೆಯುತ್ತಾರೆ. ಅವರ ಮಸೀದಿಗಳಲ್ಲಿರುವವರನ್ನೂ (ಕೂಡ) ಅವರು ಕೊಲ್ಲುತ್ತಾರೆ ಹಾಗೂ ಅದರ ಕಟ್ಟಡ ಮತ್ತು ಸೌಲಭ್ಯಗಳನ್ನು ಸ್ಪೋಟಿಸಿ ಧ್ವಂಸಗೊಳಿಸುತ್ತಾರೆ.(ಇವೆಲ್ಲಾ ಕುಕೃತ್ಯವನ್ನೆಸಗಿ ನಂತರ), ಇದು ಅಲ್ಲಾಹುವಿನ ಮಾರ್ಗದಲ್ಲಿ ನಡೆಸುವ ‘ಜಿಹಾದ್’ ಆಗಿದೆಯೆಂದೂ, ಹಾಗೂ ಅವರೆಲ್ಲರೂ ಮುಜಾಹಿದೀನ್’ಗಳೆಂದೂ (ಧರ್ಮದ ಹೋರಾಟಗಾರರೆಂದು ಭ್ರಮೆ ಪೀಡಿತರಾಗಿ) ವಾದಿಸುತ್ತಾರೆ!.

ಇದರ ಬಗ್ಗೆ (ಪ್ರತಿಯೋರ್ವರೂ) ಜಾಗರೂಕತೆಯಿಂದಿರಬೇಕು, ಮತ್ತು ಈ ಬಗ್ಗೆ ಅಜ್ಞಾನದಲ್ಲಿರುವವನನ್ನು ಎಚ್ಚರಿಸಿ ತಿಳಿಗೊಳಿಸಬೇಕು ಹಾಗೂ ಇದರಿಂದಾಗಿ ವಂಚನೆಗೊಳಗಾದವನನ್ನು ಎಚ್ಚರಿಸಬೇಕು, – ಇದು ‘ಜಿಹಾದ್’ ಎಂದೂ ಹಾಗೂ ಇದರಲ್ಲಿ (ಈ ದುಷ್ಕೃತ್ಯಗಳಲ್ಲಿ) ಶ್ರೇಷ್ಟತೆಯಿದೆಯೆಂದು ಅವನು (ತಪ್ಪಾಗಿ) ಭಾವಿಸಿರುತ್ತಾನೆ, ಆದರೆ ವಾಸ್ತವದಲ್ಲಿ ಇದು ವಿನಾಶದ ಅಂಚಿನೆಡೆಗೆ ಕೊಂಡೊಯ್ಯುವ ಕಾರ್ಯಗಳಾಗಿವೆ.

ಅಲ್ಲಾಹು ಕ್ಷೋಭೆಯನ್ನುಂಟು ಮಾಡುವವರನ್ನು ಇಷ್ಟಪಡಲಾರನು. ಇದು ಭೂಮಿಯ ಮೇಲೆ ಕ್ಷೋಭೆಯನ್ನುಂಟು ಮಾಡುವ ಕಾರ್ಯಗಳ ಪೈಕಿಯಾಗಿದೆ. ಅಲ್ಲಾಹು ಕ್ಷೋಭೆ ಹರಡುವವರನ್ನು ಇಷ್ಟಪಡಲಾರನು. ಇದಕ್ಕೂ ಮಿಗಿಲಾಗಿ, ಯಾರನ್ನು ಅಲ್ಲಾಹು ಅನ್ಯಾಯವಾಗಿ ಕೊಲ್ಲುವುದನ್ನು ನಿಷೆಧಿಸಿರುವನೋ (ಅಂತಹ) ಮುಗ್ದ ಜನರು ( ಉಗ್ರವಾದಿಗಳಿಂದ) ಹತ್ಯೆಗೀಡಾಗುತ್ತಿದ್ದಾರೆ. 
ಅವರು (ಉಗ್ರವಾದಿಗಳು) ಅಪರಾಧ ಕೃತ್ಯಗಳಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುವುದಲ್ಲದೆ , ತಮ್ಮ ಮೇಲೆ (ಬಾಂಬ್) ಸಿಡಿಸಿ ಆತ್ಮಹತ್ಯಾ ದಾಳಿ ನಡೆಸಿಕೊಂಡು ಸ್ವತಃ ತಮ್ಮನ್ನು ತಾವೇ ಕೊಲ್ಲಲೂಬಹುದು ಹಾಗೂ (ಇವೆಲ್ಲಾ ಕುಕೃತ್ಯವನ್ನೆಸಗಿಯೂ ಅವರು) ಇದು ಹುತಾತ್ಮತೆಯೆನ್ನುತ್ತಾರೆ.

ಆತ್ಮಹತ್ಯೆ ಮಾಡಿಕೊಂಡವನು ನರಕಾಗ್ನಿಯಲ್ಲಿರುವನೆಂದು ರಸೂಲ್ (H) ರವರು ಹೇಳಿರುವಾಗ ಹೇಗೆ ತಾನೇ ಅವನು ಹುತಾತ್ಮನಾಗುತ್ತಾನೆ? ಅಲ್ಲಾಹು (E) ಹೇಳಿದ್ದಾನೆ :

﴿ وَلَا تَقْتُلُوا أَنفُسَكُمْ ۚ إِنَّ اللَّـهَ كَانَ بِكُمْ رَحِيمًا ٩٢ وَمَن يَفْعَلْ ذَٰلِكَ عُدْوَانًا وَظُلْمًا فَسَوْفَ نُصْلِيهِ نَارًا ﴾

“ನೀವು ನಿಮ್ಮನೇ ವಧಿಸದಿರಿ, ಖಂಡಿತವಾಗಿಯೂ ಅಲ್ಲಾಹು ನಿಮ್ಮೊಂದಿಗೆ ಅಪಾರ ಕರುಣೆಯುಳ್ಳವನಾಗಿರುವನು. ಯಾರು ಅತಿಕ್ರಮವಾಗಿ ಮತ್ತು ಅನ್ಯಾಯವಾಗಿ ಅದನ್ನು ಮಾಡುವನೋ, ಅವನನ್ನು ನಾವು ನರಕಾಗ್ನಿಯಲ್ಲಿ ಉರಿಸುವೆವು. ಅದು ಅಲ್ಲಾಹುವಿಗೆ ಅತಿ ಸುಲಭವಾದುದಾಗಿದೆ.” (ಕುರ್‌ಆನ್ 4 : 29-30)

ಸಹೀಹ್ (ಅಧಿಕೃತವಾದ) ಹದೀಸ್’ನ ಉಲ್ಲೇಖದಂತೆ ರಸೂಲ್ (H) ಹೇಳಿರುವರು :

“ಯಾರು ವಿಷ ಸೇವಿಸಿ ತನ್ನನು ತಾನೇ ಕೊಲ್ಲುವನೋ (ಆತ್ಮಹತ್ಯೆ ಮಾಡಿಕೊಳ್ಳುತ್ತಾನೋ) ನರಕಾಗ್ನಿಯಲ್ಲಿ ಅದನ್ನು (ವಿಷವನ್ನು) ತನ್ನ ಕೈಯಲ್ಲಿ ಹಿಡಿದು ಎಡೆಬಿಡದೆ ಸೇವಿಸುತ್ತಲೇ ಇರುವನು. ಯಾರು ಕಬ್ಬಿಣದಿಂದ ತನ್ನನು ತಾನೇ ಇರಿದು ಕೊಲ್ಲುವನೋ (ಆತನು) ನರಕಾಗ್ನಿಯಲ್ಲಿ ಅದನ್ನು (ಕಬ್ಬಿಣವನ್ನು) ತನ್ನ ಕೈಯಲ್ಲಿ ಹಿಡಿದು ತನ್ನನೇ ಇರಿದುಕೊಳ್ಳುತ್ತಾ ಇರುವನು . ಯಾರು ತನ್ನನು ತಾನೇ ಬೆಟ್ಟದ ಕೆಳಗೆ ಧುಮುಕುವ ಮೂಲಕ ಕೊಲ್ಲುವನೋ (ಬೆಟ್ಟದಿಂದ ಹಾರಿ ಆತ್ಮಹತ್ಯೆಗೈಯ್ಯುತ್ತಾನೋ) ಆತನನ್ನು ನರಕಾಗ್ನಿಯ ಕೆಳಗೆ (ನಿರಂತರವಾಗಿ) ಎಸಯಲಾಗುವುದು. (ಮುಸ್ಲಿಮ್ : 175)

ಆದ್ದರಿಂದ ಆತ್ಮಹತ್ಯೆ ಮಾಡಿಕೊಂಡವನು ಮಹಾಪಾಪವನ್ನು ಎಸಗಿರುತ್ತಾನೆ. (ಹೀಗೆ ) ನರಕಾಗ್ನಿಗೆ ಗುರಿಯಾಗುವವನನ್ನು ಹುತಾತ್ಮನೆಂದು ಕರೆಯುವುದಾದರೂ ಹೇಗೆ ?ಆತನು ನರಕಾಗ್ನಿಗೆ ಹೋಗುವನೆಂದು ರಸೂಲ್ (H) ರವರು ಹೇಳಿರುವಾಗ ಅವನನ್ನು ಸ್ವರ್ಗವಾಸಿಯೆಂದು ಹೇಳುವುದಾದರೂ ಹೇಗೆ?? 

ಇಂದಿನ ಕಾಲದ ಹಿರಿಯ ಶ್ರೇಷ್ಠ ವಿದ್ವಾಂಸರುಗಳಾದ ಅಶ್ಶೈಖ್ ರಬೀಅ್ ಅಲ್-ಮದ್‍ಖಲೀ, ಅಶ್ಶೈಖ್ ಸಾಲಿಹ್ ಅಲ್ ಫೌಝಾನ್, ಅಶ್ಶೈಖ್ ಉಬೈದ್ ಅಲ್ ಜಾಬಿರೀ, ಅಶ್ಶೈಖ್ ಅಬ್ದುಲ್ ಮುಹ್ಸಿನ್ ಅಲ್-ಅಬ್ಬಾದ್ ಮುಂತಾದ ಸೌದಿ ಅರೇಬಿಯಾದ ಅಹ್ಲುಸ್ಸುನ್ನಃದ ವಿದ್ವಾಂಸರೆಲ್ಲರೂ ಕೂಡಾ ಉಗ್ರವಾದವನ್ನು ಮತ್ತು ಆತ್ಮಹತ್ಯಾ ದಾಳಿಗಳನ್ನು ತೀವ್ರವಾಗಿ ಖಂಡಿಸಿರುತ್ತಾರೆ ಹಾಗೂ ಅಂತಹ ಪಾತಕಿಗಳನ್ನು ಬೇರು ಸಹಿತ ಕಿತ್ತೆಸೆಯಲು ಜಗತ್ತಿನ ಮುಸ್ಲಿಮರಿಗೆ ಅವರು ಕರೆ ನೀಡಿರುತ್ತಾರೆ.